Kitu Bericht 2006

Am 27. Oktober sim mer mit 40 Kitu Ching i di nöii Saison gschtartet, vierzg, zabbligi, ufgregti u ufgschteuti Ching hei mer ir Haue dörfe begrüsse, u hei grad mit emene nöie Begrüssigsvärsli agfange.

O hür si Kitu Plätz innert kurzer Zyt vergäh gsi u mir hei paar Absage muesse mache, was mir immer sehr leid tuet, Ching nid chönne z’näh wott doch so gärn möchte cho turne. Aber mit meh aus vierzg Ching z’turne cha u darf i eifach nid verantworte.

Mir hei i dere Zyt wo mer turne, scho ganz viu Grät mit de Ching füregno, dass si gseh was me so aues cha mache dermit, hei gspiut, hei gsunge u tanzet u no viu meh. Vor Wiehnacht heimer no ä bsungeri Wiehnachtslektion mit emne Grätparcours gmacht u jedes Ching het dörfe ä säubergmachte Grittibänz mit hei näh, merci no mine Leiterkolleginne für di Arbeit wo si sech gmacht hei bim Grittbänze bache.

I ha z grosse Glück über äs super Leiterteam z’verfüege wo ni mi 100% druf cha verlaa. Das Team besteit us dr Nicole Schwab, dr Nadia Mischler, dr Barbara Kunz, dr Annika Hecht u sit däm Jahr no verstercht dür ds Conny Jallard u ds Hildi Baumgartner. I möchte ihne a dere Steu mau ganz härzlech für ihre gueti Arbeit u ihre grosse Isatz danke. Es isch mängisch nid immer ganz eifach dene viele verschiedene Ching grächt zwärde, me geit mängisch nach ere Kitu Schtung mit emene schturme Chopf us dr Haue me isch zwar körperlech nid eigetlech gschafft aber geischtig umsomeh. Drum auso es ganz grosses Merci a mini Kitu Froue.

I möchte o no churz erwähne, dass Barbara Kunz im letschte Jahr dr Kitu Leiterkurs i drüne Wuchenänd mit Erfoug absolviert het. Äbefaus aus früsch bachni Kitu Leiterinne dörfe sech ds Conny Jallard, ds Hildi Baumgartner u ig nenne, mir hei am erschte Januar Wuchenänd dr Kitu-Queristieger Kurs gmacht, mir si quer igstiege wöu mir bereits dr J+S Leiterkurs hei gha, u de bruchts nume no eis Wucheänd.

Üse Kitu Kurs duret jetz no bis zur Oschtere u de hei mer de wieder Pouse bis nach de Herbschtferie. Mir fröie üs no uf mängi luschtigi Turnschtung u tüe mit üsne Chnöpf scho fliessig für ä Cherzerslouf trainiere.

Mir vom Kinderturne wünsche üsem grosse Brueder em TSV ganz es erfougrichs Turnerjahr 2007 mit viune Glanzleischtige am Eidg. Turnfescht ds Frouefäud.

Autor:	Karin Studer
Datum:	1. Juli 2007